
ਕਲਪਨਾ ਕਰੋ ਕਿ ਇੱਕ ਸਵੇਰ ਪੂਰਾ ਪਿੰਡ ਜਾਗੇ ਅਤੇ ਉਸ ਨੂੰ ਪਤਾ ਲੱਗੇ ਕਿ ਰਾਤੋ-ਰਾਤ ਕਿਸੇ ਨੇ ਪਿੰਡ ਦੇ ਚੌਂਕ ਦੇ ਬਿਲਕੁਲ ਵਿਚਕਾਰ ਟੂਣਾ ਕਰਕੇ ਰੱਖ ਦਿੱਤਾ ਹੈ। ਫਿਰ ਕੀ ਹੋਵੇਗਾ?
ਪਿੰਡ ਵਾਸੀਆਂ ਦੇ ਮਨ ਵਿੱਚ ਇੱਕੋ ਡਰ ਘਰ ਕਰ ਜਾਂਦਾ ਹੈ ਕਿ ਜਿੰਨਾ ਚਿਰ ਇਹ ਟੂਣਾ ਪਿੰਡ ਦੇ ਚੌਂਕ ਵਿੱਚ ਪਿਆ ਰਹੇਗਾ, ਓਨਾ ਹੀ ਇਸ ਦਾ ਅਸਰ ਪੂਰੇ ਪਿੰਡ ਵਿੱਚ ਫੈਲਦਾ ਜਾਵੇਗਾ ਅਤੇ ਆਖ਼ਰਕਾਰ ਹਰ ਘਰ ਤੱਕ ਇਸ ਦੀ ਮਾਰ ਪਹੁੰਚੇਗੀ, ਜਿਸ ਤੋਂ ਬਾਅਦ ਕੁਝ ਬਹੁਤ ਬੁਰਾ ਵਾਪਰ ਸਕਦਾ ਹੈ।
ਹੁਣ ਸਵਾਲ ਇਹ ਹੈ ਕਿ ਇਸ ਟੂਣੇ ਨੂੰ ਕਿਸ ਨੇ ਰੱਖਿਆ? ਇਸ ਦੇ ਪਿੱਛੇ ਕੀ ਮਕਸਦ ਹੈ? ਅਤੇ ਸਭ ਤੋਂ ਵੱਡੀ ਗੱਲ, ਇਸ ਤੋਂ ਛੁਟਕਾਰਾ ਕਿਵੇਂ ਪਾਇਆ ਜਾਵੇ?
ਇਨ੍ਹਾਂ ਸਵਾਲਾਂ ਦੇ ਜਵਾਬ ਲੱਭਣ ਲਈ ਪੂਰਾ ਪਿੰਡ ਜੁਟ ਜਾਂਦਾ ਹੈ। ਪਰ ਜਿਵੇਂ-ਜਿਵੇਂ ਇਸ ਸਮੱਸਿਆ ਦਾ ਹੱਲ ਲੱਭਣ ਦੀ ਕੋਸ਼ਿਸ਼ ਹੁੰਦੀ ਹੈ, ਉਵੇਂ-ਉਵੇਂ ਨਵੇਂ ਸ਼ੱਕ, ਨਵੀਆਂ ਕਹਾਣੀਆਂ ਅਤੇ ਮਜ਼ੇਦਾਰ ਸਥਿਤੀਆਂ ਜਨਮ ਲੈਂਦੀਆਂ ਹਨ।
ਟੂਣਾ ਇੱਕ ਅਜਿਹੀ ਮਨੋਰੰਜਕ ਫ਼ਿਲਮ ਹੈ ਜੋ ਪੇਂਡੂ ਜੀਵਨ, ਅੰਧਵਿਸ਼ਵਾਸਾਂ, ਮਨੁੱਖੀ ਸੁਭਾਅ ਅਤੇ ਅਣਜਾਣ ਡਰ ਨੂੰ ਕਾਮੇਡੀ ਦੇ ਰੰਗ ਵਿੱਚ ਪੇਸ਼ ਕਰਦੀ ਹੈ।
ਫ਼ਿਲਮ ਦਰਸ਼ਕਾਂ ਨੂੰ ਹਸਾਉਣ ਦੇ ਨਾਲ-ਨਾਲ ਇਹ ਵੀ ਸੋਚਣ ਲਈ ਮਜਬੂਰ ਕਰੇਗੀ ਕਿ ਕਈ ਵਾਰ ਮੁਸੀਬਤ ਅਸਲ ਵਿੱਚ ਓਨੀ ਵੱਡੀ ਨਹੀਂ ਹੁੰਦੀ, ਜਿੰਨੀ ਵੱਡੀ ਅਸੀਂ ਆਪਣੇ ਮਨ ਵਿੱਚ ਬਣਾ ਲੈਂਦੇ ਹਾਂ।
ਕਿਉਂਕਿ ਕਈ ਵਾਰ ਪਿੰਡ ਵਿੱਚ ਟੂਣੇ ਨਾਲੋਂ ਵੱਧ ਖ਼ਤਰਨਾਕ ਉਸ ਦਾ ਡਰ ਹੁੰਦਾ ਹੈ!
ਟੂਣਾ
ਪੇਸ਼ਕਸ਼: Golden Aura Films & Digilok Entertainment
ਨਿਰਮਾਤਾ: ਜਗਪ੍ਰੀਤ ਕੌਰ ਛੀਨਾ
ਲੇਖਕ: ਸੁਖਰਾਜ ਸਿੰਘ
ਨਿਰਦੇਸ਼ਕ: ਐਮੀ ਫੁਟੇਲਾ